Fissione o verità ?

“Ottobre sente castagna… dice a canzona. Ma l’aria d’issu vaghime porta più i fumi avvelenati di Lucciana o di u Vazziu, è sempre i pisticciuli di u tiliu… che a polvera bianca di a farina castagnina ! Ci vole à di chi e misure di qualità di a nostra aria nustrale so stanciate da Qualitair, quellu serviziu à l’estru pueticu : piu forte per misurà i fumacci di i batelli chi e microparticule di e centrale elettriche o i brisgiulelli murterecci di u tigliu. A un altru nivellu, d’altura naziunale, ne mancu ùn si parla di misurà e cunsequenze di Tchernobyl. E noi aspettemu sempre per sapè di quale cancheru avimu da more. A scelta c’hè, ma cum’ellu dice u prefettu : « U tabaccu hè ciò chi tomba u più i Corsi ». E casca un altru ghjudicamentu : « NON-LIEU » dice a ghjustizia, è cusi si chjode l’inchiesta cusi nebbiosa di tamanta bugia ufficiale di Tchernobyl. Non-lieu ? Vole si di chi l’affare ùn esiste più ? Forse ch’ella ùn ha mai esistitu ? Dunque sarebbi una fissione !? L’attualità ci mostra ch’ellu hè più faciule di truvà qualchi millioni per fà un filmu di caricattura di a Corsica, che 400  000 auri per l’inchiesta d’epidemiologia mustrendu a salute di i Corsi. Vistu l’ultimi filmoni, da poi l’Enquête corse, via a seria Mafiosa, sin’à Mission sacrée, ci tocca à crede chi preferimu a fissione à a verità. Eccu u prussimu scenario : isula persa in lu mare terraniu, amministrazione mute, cartulari piattati, lochi originali, militanti associativi testardi è rompi stacche, giudici independenti, operazione Mani pulite, e cetera. Di che fà un bellu filmu pulizieru nè ? Un ci ferma più ch’ha chjamà u commissariu San-Antonio !